Arias Cachero abre la muestra de la Fundación "La Caixa" con una intervención n'asturianu

"El conceyal de Cultura del Ayuntamientu d'Uviéu, José Suárez Arias-Cachero, anunció esti miércoles, durante la presentación de la muestra ""Neolítico, de nómadas a sedentarios"" de la Fundación ""La Caixa"", el so enfotu porque la siguiente esposición que la Obra Social de la entidá lleve a la capital asturiana tenga los cartelos billingües, lo mesmo que pasa en Cataluña y Galicia, faciendo asina por normalizar la llingua asturiana.

""Va facese billingüe dafechu"", sorrayó'l conceyal, qu'esplicó que na esposición que podrá visitase hasta'l 25 de marzu, nun pudo facese asina porque los paneles yá taben fechos. Sicasí, sí pudieron editase dos folletos informativos, ún en castellán y otru n'asturianu.

Según Arias-Cachero, que dio la rueda de prensa n'asturianu, con esta iniciativa va espardese ""l'usu y la normalización"" de la llingua, lo mesmo que faen nel restu los sitios nos que ""los españoles tienen la suerte de ser billingües""

Asina mesmo, dixo qu'esti yera'l mou de retrucar a les declaraciones del delegáu del Gobiernu n'Asturies, Antonio Trevín, nes que consideraba que l'alcalde d'Uviéu, Gabino de Lorenzo, usaba l'asturianu namás que pa ""babayaes"". ""Nun vamos aceutar, y tamos demostrándolo con esti exemplu, espresiones d'esti calter vengan de quien vengan, sobre manera d'una persona que foi presidente del Principáu y nun fizo nada pola normalización del asturianu y que siendo delegáu del Gobiernu nun almite a trámite, nel rexistru de la Delegación, escritos n'asturianu"", sorrayó l'edil.

""Tamos amestando la nuestra llingua a una cosa tan guapa como esta esposición"", dixo José Arias Cachero, quien apuntó que ye ésti un fechu ""importante"" pa la ciudá y p'Asturies."