Reacciones a la llei de la TV

La Llei de Radiotelevisión d'Asturies que va aprebase esti vienres na Xunta Xeneral del Principáu nun ta alcontrando munchu consensu social. Agora ye'l sindicatu Comisiones Obreres quien pide modificaciones na llei pa que'l director xeneral del organismu salga por mayoría cualificada del Parlamentu Asturianu, en cuenta de designalu el gobiernu pela so cuenta. Otra quexa de CCOO ye sobre'l conseyu d'alministración del ente, órganu de decisión en que piden que tengan representación los sindicatos y otros axentes sociales que sí que tan nel Conseyu de Comunicación, órganu asesor complementariu al primeru
. CCOO critica tamién la poca cuota de programación (sobre'l 15%) que se dexa pa la producción propio y pide una presencia digna de la llingua asturiana na futura RTVAS, reclamando, énte la falta de definición del testu llegal, una política de "discriminación positiva" nesti sentíu.

Otramiente, el partíu políticu Izquierda Asturiana tamién criticó'l proyectu de RTVAS en términos asemeyaos. Pa IAS el PSOE "nun aplica los criterios que sí aplica n'otres comunidaes del estáu con llingua propia" no que cinca a la cuestión del usu del idioma y tampoco sigue lo que predica Zapatero y l'exemplu d'otres autonomíes al ñegar "una composición democrática de la TV con representación d'axentes sociales y con una elección non directa por parte del gobiernu".

Pela so parte, la Xunta Pola Defensa de la Llingua Asturiana sigue cola so campaña d'unviu de correos electrónicos a los parllamentarios asturianos en protesta pola falta de reeconocencia de la llingua asturiana na RTVAS. Según fontes de la Xunta, nqu'anima a siguir participando na campaña, yá se lleven mandaos cerca de mil correos ellectrónicos que tan estragando les cuentes de los diputaos