Númberu nuevu de la revista Belenos

Ta acabante d'espublizase'l númberu 14 de la revista "Asturies, memoria encesa d'un país". La revista, insinia del Conceyu d'Estudios Etnográficos Belenos, presenta nel índiz d'esti primer númberu del añu (anque fecháu como segundu del 2.002) un garapiellu d'artículos de temes d'investigación como'l qu'escribe José Antonio González Calle sobre la evolución de los horros en conceyu de Corvera o la collaboración de los arqueólogos Jorge Camino y Yolanda Viniegra, que faen un repás a los castros del oriente d'Asturies.

Anque estos artículos van prestá-y más interés de xuro al públicu interesáu en temes d'investigación etnográfica y histórica, esti númberu de la revista tien un calter marineru que s'espeya en dos artículos que bien puen ser del interés d'un públicu cásique xeneral. D'una parte ta l'artículu que firma'l director del Muséu de la Mar Armando Rodríguez sobre la emigración tresatlántica de Carreño a América, y d'otra ta'l relatu de la espedición de los marineros asturianos a l'Antártida nel barcu de vela "Idus de Marzo", una aventura de la que tan acabante de cumplise venti años y que vien acompañada de bien de material gráficu de primerísima calidá.

Esti y otros númberos vieyos de la revista "Asturies" puen encargase yá n'Asturshop, la tienda asturiana na rede qu'ufierta pagu al través de servidor seguru con tarxeta de créditu y onde tamién pue mercase a contra reembolsu.