Duro Felguera nun s'atrevió cola Babcock

La mala traza que presentaba económicamente la operación xunto cola permala acoyida política que tuvo nel País Vascu echaron p'atrás a la Duro Felguera na operación que fizo pa mercar la empresa de orixe vascu Babcock Borsig. El presidente del Grupu Duro Felguera, Ramón Colao, dixo que nun quería pone-y cargues peligroses al grupu empresarial asturianu cola compra d´una empresa con un plan industrial mui costosu como yera la casa vasca de bienes d'equipu. Otramiente, al Gobiernu Vascu nun prestaba-y que la empresa asturiana se ficiere col control de la vasca Babcock. Tamién el PSOE y sindicatos vascos nun queríen a Duro Felguera porque consideren que la empresa asturiana nun tenía interés en potenciar la vasca. Según estes organizaciones, la Duro Felguera namás quería sorber a la Babcock pa quitase un competidor del mediu y convertir a la empresa vasca nun tallerucu. Otramiente el Gobiernu Asturianu ve con bonos güeyos que Duro Felguera nun tome riesgos d´esi calter ya que pondríen en peligru el futuru del propiu grupu asturianu. La historia vien de vieyo, y ye la segunda vegada que Duro Felguera intenta la fusión cola so competidora histórica nel sector de bienes d'equipu, anque esta vegada paecía que la cosa diba llevase a términu. El 21 de Xineru pasáu Duro Felguera y Babcock ficieron un alcuerdu de confidencialidá pol que nun plazu de venti díes s´estudiaría tola información alrodiu la compra de la empresa vasca. Pero les esixencies del proyeutu d´empresa de Babcock, comu nun poder axustar les plantilles de trabayadores como les bultables diferiencies salariales ente los trabayadores vascos y asturianos al favor de los primeros acabaron por echar p'atrás al grupu asturianu, anque'l noyu de la cuestión taba en qu'nvertir 135,5 millones d´euros en Babcock, moderniza-y les infraestructures teunolóxiques y comprometese a triplicar la facturación de la empresa vasca suponía camudar tola estratexa de Duro Felguera. Agora la SEPI ta a la gueta de atopar un nuevu comprador, oxetivu perdifícil ya que la entidá estatal de participaciones industriales quier que´l futuru propietariu caltenga'l proyeutu del plan industrial. Mentantu la SEPI sigue sofitando con avales les fábriques vasques de Babcock pa siguir cola actividá y caltener los puestos de trabayu. Babcock & Wilcox ye una empresa vasca fundada nel añu 1918 con sede en Bilbao. Les actividades d´esta empresa son el material ferroviariu, productos llaminaos, calderes y equipos industriales. A últimos de los setenta, la crisis del sector azotola en condiciones, faciéndose cargu d'ella l'Estáu en 1979 al traviés del antiguu I.N.I. nuna operación qu'incluyó suspensión de pagos pel medio, privatizándola la SEPI l'añu pasáu. La operación pola que Babckock pasó a ser propiedá de la casa alemana Borsig dexaba en caxa a la SEPI 55 millones d´euros, too ello tres d'unes perdes acumulaes de más 1.000 millones d´euros y d'una sangría de más de 4.800 puestos de trabayu, pero hai pocos meses la empresa alemana presentó una suspensión de pagos, colo que la operación con ella quedó pa prau.