La variante de Payares y l'AVE catalán

Esta selmana, el Ministru de Fomentu dio anuncia de l'asignación de 1.085 millones d'euros pa la construcción de la variante de Payares. El ramal del tren que dea salida pa Castiella ye la obra ferroviaria pendiente más importante del país y una de les infraestructures más importantes xunta l'autovía del cantábricu, y tien de venir a sustituyir a l'actual rampla de Payares, un románticu ramal del sieglu XIX prestosu de conocer polo que tien d'espectacular pel que nun puen pasar más qu'un númberu llendau de trenes al día a una velocidá másima de 50 kilómetros a la hora. La variante, que según les opiniones más optimistes va tar funcionando pal 2.010, llega de cualquier manera con retrasu. En tiempu de la UCD tuvo nun tris de facese, pero la crisis d'aquel gobiernu dexo'l proyectu pa prau. La variante volvío a l'actualidá en 1.989, cuando'l gobiernu socialista aneciaba en nun facela y tola oposición armó una plataforma que se manifestó per Uviéu 100 años depués de la marcha cívica que pidiere en 1889 la construcción de la vieya rampla ferroviaria. El gobiernu del PP acabó por almitir la variante nel so plan d'infraestructures ferroviaries, que diseñó la cadarma de l'alta velocidá na península, pero nos planes de Fomentu la construcción del ramal asturianu diba depender siempres de que se ficiere primero'l tunel del Guadarrama, la otra variante qu'hai nel exe Madrid-Asturies. A la fin, y dempués de muncho esperar, parez que va dir d'esta.Con too y con ello, la obra va tener un impactu mediuambiental grande. Los 45 kilómetros de llinia van precisar d'ocho pontes y d'once túneles, el más llargu de 25 kilómetros. Polo que se sabe hasta agora, afuracar la cordal que nos estrema de la meseta va producir 9,8 millones de metros cúbicos de tierra y piedra, de los que se cuenta con almacenar el 70% en cuatro escombreres que quedaríen pa la parte asturiana del tunel. Ello resulta nun estrozu grande pal Va.le Huerna, que ye amás fastera importante nos planes de recuperación del osu y del faisán montés, dambes especies en trance de desanicie. Por munchu precuru que se ponga n'amenorgar l'impactu ambiental, nun cabe dulda de que'l conceyu de L.lena va camudar enforma cola obra, ello por nun falar del ruíu de los trenes o de les esixencies d'una llinia que tien de trazase lo más derecha posible porque la velocidá del AVE nun almite curves de radiu pequeñu.L'anuncia del entamu de la variante coincidió nel tiempu cola inauguración de la llinia d'alta velocidá ente Madrid y Lleida. El primer viaxe foi un chascu que qu'igual val pa sacar enseñances. Al respective, recomendamos esta tribuna n'El Periódico de Cataluña