L'Audiencia tranca l'únicu periódicu en vascu

L'Audiencia Nacional d'España ta acabante de mandar trancar el diariu vascu Egunkaria, únicu que sal n'euskera dafechu. Amás del pieslle preventivu del periódicu, l'Audiencia mandó detener al director del diariu, Martxelo Otamendi y otros nueve directivos del periódicu por supuesta pertenencia o collaboración cola banda ETA. Ye la segunda vegada que, dende la vuelta de la democracia en 1.975, se manda trancar un periódicu. Mui apoyáu pol gobiernu vascu de la que se fizo, Egunkaria contó tamién col sofitu popular d'una campaña masiva de soscripciones, saliendo a los kioscos nel añu 1.990. D'entós p'acá ye una de les xoyes de la corona de los falantes d'euskera y púnxose siempre d'exemplu a siguir pa otres llingües, tando enxertu na rede europea de diarios en llingües minorizaes, qu'axunta a trenta periódicos en tol continente. Egunkaria y el so director punxéronse nel puntu de mira de les actuaciones de la fiscalía nacional al partir d'una entrevista qu'espublizó'l diariu con dirixentes d'ETA, pero lo cierto ye que siempre se tuvo por un diariu abondo independiente de vinculaciones polítiques, y nunca nun se-y consideró na redolada de Batasuna, como pasare con Egin, que mandare trancar la xusticia y que renació dempués como l'actual Gara. Precisamente esti calter de diariu independiente que siempres tuvo Egunkaria foi lo que llevó a un posicionamientu en contra de la orde xudicial de tola comunidá política vasca, sacantes el PP. Mientres el PNV, diz que ye "un ataque al euskara y la sociedad vasca", el PSOE vascu dixo per boca de Ramón Jáuregui que-y "sosprendió" l'actuación porque "naide nun columbró nunca a Egunkaria na redolada del terrorismu". Más fuerte foi la declaración d'Eusko Alkartasuna, que dixo que l'actuación "dexa n'evidencia la poca calidá democrática de dellos xueces y persones del Estáu español". Otramiente, la emisora pública vasca de TV, Euskal Telebista ta acabante d'espublizar esti comunicáu de la dirección onde muestra "preocupación" pola actuación y pide que s'esclarie enseguida de qué s'acusa esactamente a Egunkaria y la so directiva y qué prebes hai pa eses acusaciones. La directiva d'ETB remembra que detener a periodistes y precintar medios de comunicación afecta directamente a la llibertá d'expresión y al derechu a la información. ;ás información en El Correo Vasco, Gara y Deia