El trunfu del Farho Xixón Baloncestu y les derrotes del Vic y l'Illescas déxenlu lider en solitariu

"El Farho Xixón Baloncestu ganó nel campu del Qalat Cajasol, filial del Cajasol sevillanu de la Lliga ACB, pol resultáu de 71 a 80. Con esti resultáu y les derrotes del Vic y l'Illescas, l'equipu xixonés ye lider en solitariu de la categoría.

L'equipu xixonés foi cuasi siempres delantre nel marcador, namás tuvieron delantre los sevillanos na primera canasta. Les diferencies nel electrónicu favoratibles a los asturianos foron importantes y dende l'entamu l'alcuentru, asina a lo cabero'l primer cuartu yera de diecisiete puntos y a lo cabero'l tercer cuartu llegó a ser de 22, 39 a 61. Los andaluces llegaron a averase a cuatro puntos 67 a 71, tres llograr un parcial de 17 a 5 nel entamu del últimu cuartu. Nel averamientu andaluz foi perimportante'l trabayu de César Bravo.
El partíu emprimó con igualdá y hebo empate a siete puntos, pero dende esi momentu los xixoneses foron mui superiores y algamaron un parcial de 0 a 15. Nel segundu cuartu estrenóse Jandl, que bien ceo diba facer trés personales, pues taba mui nerviosu. Nesti segundu cuartu los locales llograron un parcial de 6 a 0, 15 a 26, y llegaron a baxar la desventaya a nueve puntos a lo cabero'l periodu 29 a 38, pues los asturianos llegaron a perder muncho balones
Tres el descansu l'equipu xixonés volvió a garrar el mandu l'alcuentru y llegó a tener esos 22 puntos de ventaya, con Chus Pineda mandando nel campu. El periodu finó con un 46 a 64. Paecía que'l partíu taba sentenciáu, pero nel últimu cuartu'l Farho Xixón fallaba muncho n'ataque y los locales taben mui acertaos nel aru asturianu, asina algamaron un parcial de 17 a 5 y llegaron a ponese a cuatro puntos, con esi resultáu de 67 a 71. Foi cuando apareció Matt Kiefer y la ventaya volvió a ser de diez puntos y la victoria pa los asturianos.
Los xugadores más destacaos del Farho Xixón Baloncestu foron Chus Pineda (20 puntos, 4 rebotes, 3 asistencies y la meyor valoración del alcuentru con 25 puntos) y Matt Kiefer (con dobles figures -19 puntos y 11 rebotes,-, 2 asistencies y ficiéron-y 7 faltes personales), nos andaluces el más destacáu foi César Bravo (19 puntos, 2 rebotes y 3 asistencies).
Ficha técnica:
Qalat Cajasol: Joaquín Bonhome (2), Juan Alberto Aguilar (7), Dionisio Gómez (11), Ville Kaunisto (8) y César Bravo (19). Tamién xugaron: Adolfo Santos (5), Michel Diouf (12), Fulgencio Casanova (7) y Jonathan Enríquez.
Farho Xixón Baloncestu: Rubén Suárez (3), Sony Vázquez (12), Adrián García (14), Chus Pineda (20) y Matt Kiefer (19). Tamién xugaron: Peter Rajniak (2), José María Balmón (2), David Jandl, Logi Gunnarsson (3) y Brandon Wolfram (5).
Árbitrios: Alberto Fraile y Óscar Salvador.
Nel Farho Xixón Baloncestu foi elimináu por cinco faltes personales Chus Pineda, nel Cajasol nun hebo eliminaos.
Partíu de la ventésima xornada de la Adecco LEB Plata, xugáu nel Pabellón Plácido Fernández Viagas d'Alcalá de Guadaíra en Sevilla, con unos doscientos espectadores. Parciales per cuartos: 9-26, 20-12, 17-26 y 25-16."