Manifestación cociendo guerra

Güei nos más de los países del mundu faise una xornada de protesta contra la posibilidá, cada vegada más real, d'un ataque de los Estaos Uníos d'América contra Irak. El día de protesta, que va vivise n'Asturies en forma d'una manifestación que va salir de la Estación de la Renfe d'Uviéu a la 1 de la tarde, llega nun momentu críticu de la yá abegosa situación. Mientres el gobiernu de los EUA apreta la maquinaria de guerra, una OTAN frayada por primer vegada nun sofita'l criteriu de Washington, lo mesmo que la ONU, que tampoco nun quier dar de pasu la operación. La postura oficial americana, que xustifica l'ataque a Irak nel arsenal d'armes que supuestamente guarda'l réxime de Bagdad perdió fuerrza cola llectura ayeri del segundu informe del unviau de la ONU a Irak Hans Blix, que dixo nun tener prebes de presencia d'armes de destrucción masivo n'Irak. Otramiente, el bloque d'estaos que sofiten l'ataque, nel que tan Gran Bretaña, España y Italia, parez que ta esgayando pela parte tresalpina, y ye que'l gobiernu italianu, que de mano dixo que taba al favor del ataque, desmarcose ayeri per boca del Secretariu de Defensa, que dixo que namás se pondríen al favor en casu de que la ONU lo diere de pasu. Ello nun parez que vaya enfriar l'enfotu guerreru de Washington, qu'estos díes ta metiéndo-y priesa al despliegue de soldaos pa facer una guerra que parez que yá ta decidida de va tiempu, si facemos casu a les declaraciones del viceministru irakí Tarek Aziz, que dixo que la guerra yá namás podía parala "un milagru"