Gutiérrez recuérda-y al PP les declaraciones de Fernández Villa pidiendo'l votu de les Cuenques pal PSOE

"El secretariu d'organización de la FSA-PSOE, Jesús Gutiérrez, recordó-y al PP y al so voceru por Asturies, Gabino de Lorenzo, el fechu de que nes Cuenques ""hai un sindicatu, el de los obreros mineros d'Asturies, que yá dixo bien a les clares lo que pensaba y pa quién va pidir el votu"". Con ello, Jesús Gutiérrez facía referencia a les declaraciones de Fernández Villa, secretariu xeneral del SOMA-FIA-UGT, nes que sorrayaba que ""tenemos que dir a llevar el nuestru votu y garrar tamién el de los que viven nel nuestru entornu"" col oxetivu de que ""el día 9 se celebre una victoria del PSOE"", un partíu al que, según el cabezaleru sindical, ""siguiremos vindicando"" n'actuaciones y proyeutos.

Asina mesmo Gutiérrez declaróse sabedor del sentir popular diciendo que ""yo soi de les Cuenques y sé lo qu'ellí se piensa"" añadiendo que ""pa los que quieren metese nes Cuenques deberíen decatase de que'l PP nun gobierna nún solu conceyu"".

D'otra miente Álvaro Cuesta criticó abiertamente al candidatu del PP al Congresu, Gabino de Lorenzo, enseñando una semeya na qu'apaecía mazcaráu como un personaxe de Zarzuela, ""ye un personaxe peculiar, célebre y simpáticu que mazcara'l pocu conocimientu que tien de la política a nivel estatal""."