Venden el funicular de Bulnes

El tren que xube al pueblu de Bulnes, qu'entamó siendo un serviciu pa los habitantes y qu'agora ye una de les mayores atracciones turístiques del conceyu, ta en venta. El Principáu punxo a concursu la esplotación por plazu d'un añu del remonte de Bulnes, tres especialísimos kilómetros de ferrocarril polos que puyen Fomentu de Construcciones y Contrates y la multinacional asturiana Alsa. Los númberos del funicular superaron nel 2.002 toles espectatives, en cuantes que naide contaba con que montaren nelli 50.000 persones, un datu que fai del funicular la mayor atracción del oriente y la segunda o tercera d'Asturies tres d'el Muséu de la Minería (85.000 visitantes) y el del Ferrocarril, si ye que val la comparanza. Como en Bulnes viven 23 persones, nun fai falta tener estudios pa sacar d'ello que los más de los billetes pagáronlos turistes que, llamaos pola novedá o pol encantu del pueblu, nun vieron mayor estorbisa nos descomanaos precios del remonte, penriba de los 15 euros y que se punxeron precisamente pa que'l turismu nun tomare al asaltu la instalación. Anque'l funicular nun dexó de llevar xente al pueblu, los más de los turistes llevaben un disgustu cuando, al llegar arriba, comprebaben que dende Bulnes nun se ve "El Naranjo de Bulnes" despropósitu toponímicu pol que se conoz al Picu Urriellu, masa montañosa que queda tapada pa la vista dende Bulnes, una aldea guapa pero empozada y dende la que nun hai precisamente un panorama de postal. Contradictorio pero verdá.