El Sporting de Xixón ganó ensin meyorar el xuegu

L'equipu asturianu ganó por primer vegada en casa nesti 2008, pero'l marcador de dos a cero a favor del conxuntu local nun ha tapecer lo probetayo del fútbol del Sporting, que supo polo menos nesta ocasiónn aprovechar les sos oportunidaes y nun cometer fallos de concentración, anque tamién ye verdá que'l rival que tuvo, un Xerez qu'ocupa puestu de descensu a segunda B, nun tuvo argumentos pa llevar el trunfu nin pa merecer l'empate.

Con too y con ello, el Sporting nun salió mui convencíu al campu, y la primer media hora de xuegu foi torpe, con ciertu dominiu pal equipu visitante, que tuvo les sos meyores ocasiones gracies a Momo y Viqueira. Nel últimu cuartu d'hora, el Sporting metióse nel partíu y entamó a crear ocasiones, marcando en cinco minutos dos goles, el primeru gracies a Bilic, que convertió un bon pase de David Barral, el polmón del equipu. Kike Mateo, rematando de cabeza un saque de falta, peslló l'alcuentru. El segundu tiempu nun tuvo mayor hestoria, y mientres el Sporting guardó los trastes, sacando a Michel, el Xerez nun pudo crear ocasiones de peligru, acabando la nueche nuna aburrición de la que namás salen en claro los trés puntos.