Conciertu de la Quintana y cursu pal Macallan

La escuela de música tradicional "La Quintana"
entama un conciertu esti llunes en Xixón, per otru llau, "Les Xanes
S.A." patrocina un cursu preparatoriu pal Macallan d'esti añu.



"La Quintana" ye una iniciativa qu'echó a andar en
Xixón va cinco años; nesta escuela enséñense
instrumentos como la gaita, curdión, tambor, bandurria, vigulín,
guitarra, ...etc, ellí tan poniendo clas xente como
Santi
Caleya, Xuán Nel Expósito, David Varela, Daniel García
de la Cuesta, Horacio Huerta...etc. Tolos años per estes feches entamen
esti conciertu, que quier ser una oportunidá pa que los alumnos de
distintos niveles amuesen los avances que van faciendo. Esti conciertu
tamién sirve de llugar pa mostrar distintes iniciatives que van saliendo
de la escuela, como bandines o la "Banda de Gaites La Quintana",
qu'entamó a furrular esti añu cola direción de Santi
Caleya. El llugar del conciertu va ser el
nuevu Centru Cultural de Pumarín (Centru Gijón-Sur) a les 20:00 hores.



La Delegación Asturiana del Festival
Intercélticu de Lorient entama un cursu preparatoriu pa la
edición del Macallan, el cursu tien el patrociniu de "Les Xanes
S.A.". El cursu van ser unes clases maxistrales sobre música de
Jean Baron y Christian Anneix.
Dambos son ún de les meyores pareyes de músicos de la
Bretaña y son xuraos del troféu Macallan de Gaita nel Festival
Intercélticu de Lorient. Estes clases van dirixíes a Campeones
del troféu Macallan, mayestros gaiteros y direutores de bandes de gaites
asturianes. P'aquellos interesaos en competir esti añu pol Macallan
estes clases garren abondo interés, ya qu'esti añu'l concursu
presenta la novedá de que van competir tamién gaiteros bretones
cola gaita Veuze, polo que ye
obligatoriu interpretar pa los gaiteros asturianos tocar dalguna pieza del
repertoriu d'esta gaita bretona.



Les clases ven ser en Villanueva de Santu Adrianu los díes 28 y
29 d'esti mes, pa más información podéis dir a la web de "Les Xanes".