Conciertu al favor de la comunidá asturiana n'Arxentina

Coincidiendo col cabudañu de que se desatare la crisis n'Arxentina, el Conseyu de Comunidaes Asturianes organiza pa esti fin de selmana un festival benéficu al favor de la comunidá asturiana n'aquel país, qu'integren cerca de 50.000 persones venceyaes a los 16 centros asturianos espardíos pela nación. Aparte de los efectos de la crisis na seguranza y calidá de vida en xeneral, la comunidá asturiana n'Arxentina tien el problema añadíu de ser una población de muncha edá que sufre especialmente'l desaniciu de los sistemes de seguridá social y sd'asistencia médica.

Nel festival van participar la Banda de Gaites de Mieres, el tenor Joaquín Pixán, Yolanda Pidal, Tina Gutiérrez, Carmen Suárez del Río, Vicente Díaz, el grupu folk "Guxán de Lluz" el grupu de baille asturianu "El Cabazo" y el conxuntu de rock duro "Avalanch". El conciertu va facese esti domingu día 22 a les 7 de la tarde nel Auditoriu "Príncipe Felipe" d'Uviéu, y les entraes, al preciu de seyes euros, puen mercase na taquilla del Teatru Campoamor o na sé del Conseyu de Comunidaes Asturianes. Esiste tamién la posibilidá de mercar entraes simbóliques de "fila 0" ingresando les perres na cuenta de Caxastur col númberu 2048 0163 31 0340007654.