El Garrapiellu defenderá la Llingua Asturiana énte la UNESCO

"La Tertulia Cultural El Garrapiellu mandará una delegación asturiana énte'l Comité Intergubernamental pa la Salvaguarda del Patrimoniu Cultural Inmaterial de la UNESCO, que va aconceyar en Sofía del 18 al 22 de febreru del 2008.

La delegación d' El Garrapiellu, integrada por Ánxel Nava y Sixto Armán, miembros de la Xunta Direutiva, centrará la so actividá na situación y alderique social plantegáu al rodiu la oficialidá de la llingua asturiana, y gallego-asturiano, teniendo preparao un panel informativu y una presentación d'esta problemática.

La UNESCO, nel marcu del Añu InternacIonal de les Llingües proclamáu poles Naciones Xuníes el 16 de mayu del 2007, llanza l'eslogan: ""¡Los idiomes sí que cuenten!"" y convida a los sos socios a multiplicar les sos actividaes con mires a fomentar y protexer tolos idiomes, sobre manera los que tean en peligru, en cualesquier situación intelectual y coleutiva. Contemplando la UNESCO nel so Atlas de les Llingües Amenorgaes al asturianu como llingua en peligru, convida a esta llingua a participar nel foru, garrando'l testigu nesti casu LA Tertulia Cultural El Garrapiellu.

Na so esposición El Garrapiellu desarrollará conceutos relativos al orixe de la llingua, evolución histórica y problemática sociollingüística, centrada esta sobre manera na necesidá d'un estatus xurídicu."