Marea negra, marea de xente

Santiago de Compostela vivió ayeri la manifestación más grande na historia de Galicia. Cerca de 200.000 persones salieron a la cai desixendo responsabilidaes polítiques nel casu del petroleru más famosu de la historia. Mientres la marea humana llegaba a la Plaza del Obradoiro, la segunda marea negra, más grande que la primera llegaba a la costa gallega. Pa conocer como foi la manifestación recomendamos echá-y una güeyada al especial del portal gallegu Vieiros.

Otramiente, dende Greenpeace anuncien que'l CSIC ta acabante de dar el resultáu de los análisis del fuel del Prestige, y dicen qu'estos análisis confirmen l'alta tosicidá del galipote, que contién, ente otros axentes dañibles pa la salú, hidrocarburos aromáticos policíclicos (PAHs) pesaos (los más
tósicos y potenciales canceríxenos según la organización ecoloxista), benzo(a)pireno,
benzofluorantenos y indeno(1,2,3-cd) pireno. Estos resultaos concueyen colos análisis de la marina francesa, mientres que los análisis qu'encargó la Xunta de Galicia nun falen de la presencia d'estos químicos.

Sobre la dirección que ta llevando la marea negra, recomendamos mirar nel web de la Universidá de Santiago de Compostela esta semeya del satélite canadiense Radarsat del día 25 de payares, onde se ven les primeres manches de petroliu tomando la curva como pa enfilar pa contra Asturies. De momentu la marea ta entrando yá esta mañana na Ría d'Arousa.