Australia pide perdón

"Australia pidió disculpes el pasáu miércoles pol ""maltratu históricu"" al que se sometió a los aboríxes nel pasáu, demientres que, pela so parte, los voceros indíxenes afirmaron que van collaborar pa pone-y el puntu a ""xeneraciones marcaes pol dolor"".

El primer ministru australianu, Kevin Rudd, afirmó un día dempués d'aconceyase colos aborixes nel Parlamentu, que les antigües práutiques poles que los neños aborixes, conocíos como ""la xeneración robada"", yeren alloñaos de les sos families pa llevalos a otres cases, ye una ""mancha nel alma la nación"".

""Güei'l parlamentu aconceyóse pa iguar un gran error"", sorrayó Rudd, quien quiso pidir disculpes poles lleis y polítiques d'anteriores gobiernos y parlamentos que ""xeneraron un fonderu dolor, sufrimientu y perdes nos nuestros conciudadanos australianos"". Cerca d'unos 100 miembros de la ""xeneración robada"" tuvieron presentes durante la sesión pa sentir les disculpes del primer ministru, demientres que milenta de persones esperaben a les puertes pa ver l'actu dende unes pantalles de televisión xigantes.

Anguaño Australia tien unos 460.000 indíxenes que constitúin el dos por cientu de los 21 millones de la población, anque siguen siendo ún de los grupos más desfavorecíos, con unos índices de mortalidá infantil, desemplegu, abusu de drogues y violencia doméstica superiores a los del restu la población."