Xeneral Riego

Ayeri na Plaza de La Cebada de Madrid, un de los personaxes más importantes de la historia d'Asturies recibió un homenaxe bien polémicu.

El xeneral Rafael del Riego, héroe y martir de los derechos democráticos, taba previsto que recibiere l'homenaxe del tamién asturianu ministru de Fomentu Francisco Álvarez Cascos. Aparte de que la figura d'Álvarez Cascos parez que nun concueya muncho cola solombra que proyecta Rafael del Riego sobre la Historia, l'abogáu asturianu y republicanu Francisco Prendes Quirós descubrió que'l testu de la placa cambiose pa quitar delles referencies que podíen mancar a dalguna oreya sobre lo que se pensaba poner de mano. A la fin, Cascos nun foi al actu, que consistió na inauguración d'una placa na Plaza de La Cebada, onde colgaron a Riego, víctima del trunfu del absolutismu que punxo en tronu a Fernando VII tal día como esti nel añu 1823. Cascos dixo que tenía problemes d'axenda, y nel homenaxe quedaron namás que los representantes del Principáu y los republicanos que s'axuntaron na mañana madrileña, que cantaron el célebre himnu, acabando l'homenaxe nuna sidrería allegada a la Plaza.

Nacíu en Tuña, conceyu de Tinéu, Riego lluchó contra los franceses na guerra napoleónica, onde quedó presu de la tropa gala, que lu mandó deportáu a Francia. Mientres tuvo per allá, caltriaron per él los ideales lliberales y demócrates, que depués defendió n'España, siendo ún de los padres del trieniu lliberal (1820-1823) y llegando a presidir les cortes en cuantres que yera diputáu por Asturies, arriendes de Capitan Xeneral de Galicia y Aragón. En defensa de la Constitución, levantose contra'l regresu del absolutismu, pero prindáronlu y acabó colgáu en plaza pública pa dar exemplu de como les gastaba'l monarca absolutu.