El renovador de la gaita

Inaugurose ayeri nel Antiguu Institutu de Xixón una esposición qu'enseña la vida y obra de Manolo Quirós, un de los gaiteros más conocíos d'Asturies y poersona clave nel resurdir de la gaita gracies al so trabayu como enseñante, músicu y divulgador. Cuando se metió pola gaita, que tuvo que deprender a tocar en Madrid, la gaita y la música asturiana taben cásique criando mofu, llendaes a unos usos folclóricos (nel sentíu más despectivu de la pallabra) que garantizaben a mediu plazu la so desapaición. Dende últimos de los setenta hasta que nos dexó nel añu 2001, Manolo Quirós dedicose a un trabayu intensivu, lo mesmo como músicu que como mayestru, investigador y divulgador que collaboró enforma al resurdir del instrumentu. Como músicu, foi quien a que la gaita asturiana seya anguaño un instrumentu vivu capaz d'enxertase en conxuntos musicales de tolos estilos. Como mayestru, deprendió a toa una xeneración d'intérpretes nunos años en qu'había poques persones que punxeren clas de gaita. Autor de siete discos en solitario, Manolo Quirós dexa tamién una discografía abondante de collaboraciones con otros músicos, quiciás les más célebres col grupu Nuberu.La esposición sobre Manolo Quirós va tar nel Antiguu Institutu de Xixón hasta'l 17 del mes qu'entra, marchando depués pal Muséu etnográficu de Quirós, onde van tenela hasta xineru del 2003. Asturies.com collabora con esta esposición y contamos con tener pronto na rede pa los nuestros llectores una esbilla del CD-Rom interactivu sobre Manolo Quirós qu'acompaña a la esposición, que tamién consta d'un interesante documental en vídeo nel que los músicos y persones que vivieron y trabayaron col desapaecíu gaiteru aporten los sos puntos de vista sobre una persona clave pa entender la gaita como ye anguaño.