El fierrocarril asturianu afita resultaos

En medio del debate políticu ente los Gobiernos asturianu y español pola concesión de les competencies en materia de fierrocarriles de vía estrencha, que Madrid anecia en nun dexar en manes de l'autonomía, tan acabante d'apaecer los datos de tráficos de Ferrocarriles de Vía Estrencha hasta'l mes d'agostu. La empresa FEVE, dependiente del ministeriu de Fomentu, alcanzó nesi mes d'agostu unos resultaos de movimientos, lo mesmo de pasaxeros que de mercancía, de lo meyor d'unos años p'acá. Anque'l datu de pasaxeros, con 3.264.000 hasta agostu, seya una migayina más discretu que'l récord del añu 2001 cuando FEVE acabó l'exerciciu raspiando los 5 millones de viaxeros, el de mercancía da un reblagu espectacular, y ye que Feve carretó n'Asturies 1.454.000 tonelaes, el 30% más qu'ente xineru y agostu del 2001.Los bonos datos de los fierrocarriles de vía estrencha asturianos conviértenlos nun protagonista decisivu del tresporte n'Asturies. El Principáu quier xestionar esta rede, neto que faen otres comunidaes como Cataluña, Euskadi o Valencia, pero dende Fomentu dicen que, anque l'estatutu contempla les competencies en fierrocarriles propios de la comunidá, la rede de Feve n'Asturies, qu'albarca más de 600 kilómetros de vía, nun puede considerase propia d'Asturies al tener ramales qu'entren en Galicia y Cantabria.