El Tribunal de Cuentes amuesa "l'ausencia de baremos" na concesión de sovenciones

"L'informe del Tribunal de Cuentes sobre la xestión del Gobiernu del Principáu d'Asturies del añu 2003, aprobáu a finales de xineru y remitíu al Congresu los Diputaos, amuesa la ""ausencia de baremos"" na concesión de subvenciones per parte de l'alministración asturiana.

El documentu sorraya nes sos conclusiones que, d'alcuerdu col cumplimientu de la normativa na concesión de sovenciones, asina como nel pagu y comprobación de les actuaciones sovencionaes, observen que nun hai baremos ""nos que puedan sofitase los criterios de valoración previstos poles bases de la concesión"". Asina mesmo señala qu'hai dellos espedientes de sovención ""incompletos"" que torguen la comprobación de les condiciones que faen falta pa la concesión de les ayudes.

Concretamente, el Tribunal de Cuentes fizo una escoyeta ente toles resoluciones pa ellaborar l'informe nesta materia, quedándose coles fechaes el 7 de febreru de 2003 de la Conseyería d'Industria y Emplegu, pola que se convocaron subvenciones pa pymes turístiques, asina como la de 28 de febreru de 2003, tamién d'Industria y Emplegu, pola que s'aprobaron les bases que rixen la convocatoria pública pa la concesión de sovenciones pa la modernización del pequeñu y medianu comerciu."