Asturies queda colos Apóstoles d'El Greco

La serie de retratos de los Doce Apóstoles que pintó Doménicos Theotocopulos El Greco ye dende güei la pieza más importante de tola colección del Muséu de Belles Artes d'Asturies. Los cuadros, que l'artista cretense allugáu n'España pintó ente 1585 y 1590, son la única serie de los tres apostolaos que fizo qu'entovía se conserva. Dende esta web pues contemplar reproducciones y comentarios de tolos cuadros del apostoláu, anque dende llueu recomendamos la visita al Muséu.El como llegaron a Asturies estos cuadros ye otra historia. Dende 1905 l'apostoláu pertenecía a la familia del Marqués de San Feliz, Francisco Goicoerretea Sarri, aristócrata asitiáu n'Asturies que yá anunciare va tiempu que quería vender los cuadros pero ensin que salieren d'Asturies, anque estos costaben muncho más de lo que'l Muséu podía pagar por ellos. A la fin, el Marqués qu'acabó vendiendo-yoslos a la empresa siderúrxica Aceralia, que llegó a un apañu col estáu pol qu'entregaba los cuadros a cambiu de que-y perdonaren 150 millones d'euros que debía a cuenta del impuestu de sociedaes. La operación ye redonda pa la empresa, que nun se sabe seguro cuanto pagó polos cuadros, pero tamién pal Muséu, que yá puede presumir de tener una pieza de primer orde .L'actu de presentación de los cuadros, al qu'asistieron el Presidente asturianu Vicente Álvarez Areces y el Ministru de Fomentu Francisco Álvarez Cascos, terminó cola llectura d'un poema n'Asturianu de Pablo Ardisana pol director del Muséu, Emilio Marcos Vallaure