Les mancadures ensin curar de la Guerra Civil

Faen güei los 66 años del empiezu de la Guerra Civil. El llevantamientu militar que baltió la República pa poner el réxime militar de Franco entovía tien abiertes resquiebres na memoria colectiva tantísimos años depués. Ello ye qu'en dellos pueblos de la fastera del Bierzo y Babia, al sur d'Asturies, siguen descubriéndose foses comunes con fusilaos de la República, bien d'ellos asturianos. La última en conocese hasta agora ye la qu'apaeció en Piedrafita de Babia, de la que se supo esti mes.

Cuando la tropa Nacional taba pa tomar el pueblu, ofreciéron-yos rendise a los milicianos a cambéu de respeta-yos la vida, pero los franquistes nun respetaron la so pallabra y afusilaron a los sitiaos, enterrándolos depués nuna fosa común de la qu'agora les families tan recuperando los calabres. Nesti artículu d'El País sal la historia entera de los socesos de Piedrafita, un relatu que tamién llegó a la prensa europeo, saliendo nes páxines de periódicos como'l Guardian inglés. Non menos recomendable ye la visita al web de l'Asociación pola Recuperación de la Memoria Histórica, que ta entamando les campañes d'escavación y que ta llevando les identificaciones de los desapaecíos, iguando la inxusticia histórica que supón la "non esistencia" d'estos represaliaos. N'Asturies, l'Atenéu Obreru de Xixónta collaborando con esta asociación na recoyida de fiches de desapaecíos asturianos na Guerra Civil. Les fiches de los desapaecíos que vayan aportando los sos familiares llegarán al Altu Comisionáu de la ONU pa los derechos humanos, que tien una estaya de trabayu sobre desapaiciones forzaes y permanentes. Ello ye que, según establez la ONU, cualesquier persona, en cualquier momentu, tien derechu a saber qué foi de cualquier un familiar que-y metieren presu o que-y secuestrare daqué grupu políticu armáu.