Entama la Escuela d'Asturianía

La Federación Internacional de Centros Asturianos y el Conseyu de Comunidaes Asturianes, que preside Antonio Trevín, presentaron esti martes en Santu Adrianu la primer edición de los cursos d'Asturianía, que van desarrollase hasta últimos d'esti mes y nos que 25 descendientes d'emigrantes asturianos deprenderán conocimientos básicos sobre cultura y música asturianes col aquello de que, a la vuelta a los sos países d'orixe, puedan ellos dar formación como monitores neses estayes. Esti primer cursu, al que se presentaron más de 100 solicitúes ente les qu'hubo que peñerar porque nun había medios pa tanta xente, ta enfocáu sobremanera a la música, con clases intensives de gaita facilitaes polos instrumentos aportaos pola fábrica de la empresa Les Xanes de Santu Adrianu. Los directores del cursu, Vicente Jesús García y Alberto González, esplicaron que'l cursu compónse de tres ciclos nos que s'aprenderán gaita, percusión y baille. Aparte de los conteníos específicamente musicales trátase de que los alumnos d'estos cursos tengan un contactu cola Asturies real d'anguaño y la so cultura, calteniendo asina viva la rellación ente Asturies y los más de 300.000 asturianos, ente emigrantes y descendientes de primer xeneración que tan espardíos pel mundu. La presentación d'estos cursos, sobre los qu'enancharemos información, valió tamién pa que se falare del II Congresu Mundial d'Asturianía, que ta pa celebrase dientro poco. De momentu adelantóse que se trata de facer un analís de les distintes situaciones y necesidaes que tienen los estremaos Centros Asturianos pel mundu, pa lo que se fadrá una mesa con responsables de los centros de Madrid, París y Buenos Aires. Precisamente los problemes pelos que pasa l'Arxentina salieron na rueda de prensa posterior,onde s'entrugó pola situación de les ayudes a los asturianos naquel país. El representante del Gobiernu asturianu na mesa esplicó que los emigrantes asturianos tamién son españoles, y que-y correspondía al Gobiernu español poner les ayudes que-y abultaren convenientes.