L'asturianu llega a la Selmana Negra

La tensión que xenera'l conflictu llingüísticu n'Asturies treslladose el vienres a la inauguración de la XV Selmana Negra en Xixón. L'acontecimientu festivo-cultural que dirixe Paco Taibo II, amás de ser un eventu nel que la llingua asturiana nun suel tener presencia nenguna, ye un de los acontecimientos preferíos del Presidente asturianu Vicente Álvarez Areces, que suel acudir tolos años a la inauguración.Militantes de la Xunta Pola Defensa de la Llingua Asturiana aprovecharon la ocasión pa facer actos de protesta nos que se pidió la dimisión del Conseyeru de Cultura, Fernández Vallina, al qu'esta organización considera responsable del tratu discriminatoriu que se-y da al asturianu nel currículum de secundaria (ver noticia embaxo). La llegada del tren negru, con tolos escritores que participen na selmana negra y l'actu d'inauguración nel Antiguu Institutu de Xixón foron los escenarios de la protesta, que trescurrió ensin mayor problema na estación de tren pero que los servicios de seguridá intentaron afogar nel Antiguu Institutu, nun dexando que la Xunta espurriere les sos pancartes primero y requisando depués una d'elles na que se pedía la dimisión de Vallina. El poder sacar les pancartes foi cortesía de Paco Taibo II, qu'esplicó que'l nun tenía simpatíes asturianistes pero que na Selmana Negra cabíen toles visiones del mundu. El Presidente asturianu nin les demás autoridaes presentes nel actu callaron énte la protesta.