Samartín del Rei Aurelio refuga poner ordenances d'asturianu

Nel plenu cellebráu'l pasáu xueves 27 de xunu de 2002 votóse a iniciativa d'Izquierda Xunida la propuesta pa entamar dende l'ayuntamientu una política non discriminatoria qu'igualare l'usu de la llingua asturiana "realidá viva d'esti conceyu", espresó Celestino García Granda, portavoz d'IX, cola llingua castellana, que tendría de plasmase na redacción d'unes ordenances municipales. La propuesta, que diba amparada coles lleis que contemplaben el terrén llegal afayadizu, y cola alcordanza del recién avisu de la UNESCO, foi despreciada polos demás grupos municipales. Joaquín Fernández, portavoz del PP, manifestó la so incapacidá llingüística "que no pasa del chapurreo". Esta ignorancia declarada fízola estensible al restu del equipu municipal a la par que trataba d'irresponsables a los conceyales d'IX pol altu coste que conllevaba y -yos encamentaba que se trataren temes que de verdá importaren a la ciudadanía, como ye'l casu de que l'Ayuntamientu proporcione dirección y corréu elletrónicu a los conceyales. El PSOE, pela so parte, que tien mayoría absoluta nel conceyu, declaróse a favor de la potenciación de la cultura asturiana, pero votó en bloque a la escontra de la propuesta por entender que nun facía falta protexer los derechos de los ciudadanos que quieran espresase llibremente n'asturianu y que l'asturianu, amás, yá tien vida nel usu coloquial y cotidianu. Magar que'l portavoz d'Izquierda Xunida recordó que l'asturianu ye un bien patrimonial qu'hai que cuidar, namái que los cuatro conceyales colos que cuenta esti partíu políticu votaron a favor.