Diego Pangua ponse "Ente'l Cairón"

Nun hai duda qu'esti mozu ye una de les grandes promeses de la
música asturiana, por calidá como músicu y pola carrera
algamada en namás que tres años.

El ganador de Troféu Macallan nel añu 2000, ganador per
segunda vegada na "Muestra de Folclore Ciudad de Oviedo" na
categoría de pareyes de gaita y tambor, y componente del grupu Felpeyu
como gaiteru y flautista, saca'l so primer trabayu en solitariu Un puntu y
aparte na rápida carrera d'esti gaiteru llega con "Énte'l
Cairón", editáu por fonoastur y grabáu nos estudios
"Bunker" de Posada de Llanera nos meses d'avientu y xineru. Lo
primero que destaca del discu ye la demostración técnica que fai
en caúna de les pieces, sobre too en pieces como la "Xota'l
Centru" (onde ta acompañáu al tambor pol so pá, el
gaiteru y percusionista Pedro Pangua), y "Floréu de Remis"
auténtica pieza d'exhibición pa los gaiteros asturianos.

Pero esti nun ye discu de "gaita y tambor" al usu, podemos
topar un "Al pasar pel puertu" interpretáu cola flauta
travesera con una variación final, una tonada como ye "Cuando
salí d'Asturies" ente gaita y tambor la voz d'Ismael Tomás.
Pero lo que-y da un calter más novedosu a esti trabayu son temes como
"Ximielgar enantes d'usar", compuestu pol propiu Diego,
"Bulgaranaz" que ye una variación sobre la conocida
muñeira de Barganaz, qu'interpreta nel corte anterior, d'orixe
misteriosu y estructura estraña na tradición asturiana. Nestes
pieces tán les collaboraciones de músicos como
Igor Medio, Belinda
Álvarez, Carlos Redondo, Xuan Nel Exposito...etc, y Ramón Prada,
quien tamién fizo de productor del discu. Tamién hai que falar
del primer tema del discu, "Caldueñu", un amiestu de la xota
oriental "Caldueñu" y una gallegada que Diego interpreta cola
flauta travesera con acompañamientu d'otros instrumento y

programaciones, les que tamién tán presentes n'otros temes del
discu.

Un bon trabayu, nel que podemos topar la gaita en dellos estilos, que si
te peta pues
mercar
n'asturshop.