Acaba'l congresu de la fame

Finaba güei en Roma el Cume Mundial de l'Alimentación, convocáu pola Fao, órganu de les Naciones Uníes nel tema de l'alimentación, y en viendo como se desarrolló'l congresu, casi val más llamalu el congresu de la fame, más qu'otra cosa. Énte l'ausencia de grandes líderes políticos mundiales (los únicos yeren Berlusconi y Aznar), el congresu nun acaparó munchos titulares na prensa mundial, pero ello nun diz que nun se falare de coses importantes. Cinco años depués de l'anterior cume sobre esta materia, los propios cargos de la FAO llegaben a esti reconociendo que nun se cumplieren los oxetivos que se propunxeren, que pasaben por menguar el númberu de persones perbaxo la llende de la desnutrición en 22 millones al añu. Según datos de la FAO, namás se llegó a una media de 6 millones de persones menos al añu, colo que la fame nel mundu sigue nun nivel descomanáu. La inxusticia del mercáu mundial de productos agrícoles foi ún de los noyos del debate, nel que los alimentos tresxénicos tuvieron un papel protagonista. Mientres les multinacionales que los desarrollen caltienen que la mayor producción que ye posible con ellos valdrá pa esborriar la fame del mundu, organizaciones como Greenpeace piensen que pa lo único que valen ye pa que mengüe la biodiversida y pa que'l mercáu agrícola quede en manes de poderoses empreses d'intenciones bien poco filantrópiques. Como casu pa estudiar, Greenpeace propón l'Arxentina nel so informe "collecha récord, fame récord". La mesma organización espublizó esti documentu sobre les promeses incumplíes de l'anterior cume de Roma