"El Naval" en direutu

Nun tenemos munches oportunidaes de ver al dúu asturianu de pop electrónicu Mus, una d'elles ye'l próximu xueves 30, ocasión na que van presentar el so caberu álbum "El Naval".La selmana que vien sal a la cai'l nuevu álbum de Mus editáu pola discográfica Acuarela, con esti ya son 6 los discos nel mercáu de Mus, ente Ep's y álbumes. La presentación va ser esti xueves 30, dientro de la serie de conciertos "Intersecciones" organizaos por Caxastur, el llugar va ser el centru cultural de Caxastur na cai San Francisco d'Uviéu y la hora les 20:00 de la tarde.Con esti trabayu Mus dexa un poco más de llau lo lletrónicu, pa metese nun estilu asemeyáu al que teníen nel EP "Alma", folk, pop, slow-core son les notes que dominen del discu. El discu grabóse en febreru y marzu d'esti añu nuna casa del barriu del Natahoyo de Xixón, cola collaboración d'Iván Palacios (ex-Medication) al baxu, Luigi Navarro (Edwin Moses) coles guitarres y Frank Rudow (Manta Ray, Viva las Vegas) cola batería, tamién participó Irene Tremblay (Aroah), tocando la guitarra acústica na canción "Sacramento". Pa esti conciertu del xueves van contar cola collaboración de Fenando Oyagüez, un de los vigulinistes de Felpeyu. Si vos apetez conocer más coses sobre esti grupu, podéis lleer esta entrevista espublizada en "Les Noticies".