Uviéu 0 - Nástic 2

La permala situación económica del Uviéu yá trescala nel xuegu del equipu, desmotiváu dafechu y incapaz de ganar en casa dende va selmanes. Ayeri, el Nàstic, ún de los equipos más probetayos de la categoría, nun alcontró mayor resistencia pa marchar del Tartiere con un 0-2 que dexa bien claro que la cosa nun tien traza d'iguase nel clan azul. Neto que nel partíu d'ida, Cuéllar foi el primeru en machacar a un Uviéu que xugaba pa la parroquia (7.000 espectadores nel campu). Tres el gol, los de Marigil desapaecieron y nun volvieron a arrimase a la portería rival en tol primer tiempu.Anque se ficieron dellos cambeos tácticos pa la segunda parte, el partíu nun s'enderechó pa los de casa, que namás teníen a favor el que'l Nástic nun yera quien a marcar el gol de la tranquilidá. Eso sí, toles xugades de peligru pasaben peles botes de los catalanes, qu'acabaron sentenciando nel últimu minutu gracies al penalti que-y fizo Óscar Álvarez a Martín.