El puertu que necesita Asturies?

Güei acaba'l plazu pa presentar alegaciones al anteproyectu d'ampliación del Puertu d'El Musel. Va dos años que'l Ministeriu de Fomentu presentó delles alternatives pal remocique d'esta instalación portuaria, la más grande d'Asturies, pero nun foi hasta primeros d'esti añu que se presentó'l proyectu preferíu pol ente Puertos del Estáu. La "obrona" del Musel, por emplegar terminoloxía playa, va ser el mayor movimientu de tierres de la historia d'Asturies, y de facese, convertirá'l Musel nuna mole cinco veces más grande de lo que ye agora. L'Autoridá portuaria presenta la obra como una ampliación imprescindible pa ganar tráficu y meyorar la competitividá de la economía asturiana, pero los sos argumentos nun los comparte tol mundu. L'ampliación d'El Musel tendrá gravísimos efectos mediuambientales, como reconoz el mesmu informe d'impactu qu'acompaña al proyectu, un informe criticáu por dellos espertos qu'anunciaron que-y faltaben puntos bien importantes y que taba fechu ensin trabayu de campu y partiendo de datos vieyos. Más allá del impactu mediuambiental, la creación del "superdique" pue tener un efectu gravísimu sobre'l desarrollu d'otros sectores como la pesca o'l turismu, amás de suponer un cambéu irreversible de l'apariencia de la ciudá. Magar de la importancia de la tema, llama l'atención qu'ente los partíos con representación nos organismos de gobiernu, PP y PSOE apreben el proyectu ensin pone-y más pegues qu'unes poques alegaciones puntuales, mientres qu'Izquierda Xunida diga que ta contra l'actual proyectu, anque nunca entró al debate hasta l'últimu momentu, que dixo que presentará alegaciones pidiendo que s'amplie'l plazu d'esposición pública y debate de la obra. Ente la pasividá de los partíos políticos pa cola tema, namás les organizaciones ecoloxistes, partíos ensin representación y, sobremanera, vecinos y particulares que se consideren afectaos son los que tan enllenando'l rexistru d'alegaciones. Esta páxina personal, fecha por un xixonés sobráu d'argumentos pa oponese al Superpuertu, aporta bien de datos sobre l'asuntu.