Sporting 0 - Levante 1

Como vieno pasando tol añu, cada vegada que parecía que'l Sporting ponía traza d'endrechar la liga, los d'Acebal perdíen col equipu más ramplón. lo del sábadu foi más de lo mesmo, y valió con que'l Levante mangare una defensa bien plantada pa que los de Xixón nun pudieren mete-yos un gol nin siquiera xugando contra nueve. Si esto diz poco pa un equipu que quier ascender, muncho peor ye que la defensa tenga'l yá clásicu fallu tontu que permita al rival marchar colos tres puntos d'El Molinón, qu'esti añu foi un coladeru del que munchos equipos salieron con auténticos regalos. Hai que dicir en descargu del Sporting que la delantera intentolo dende tolos ángulos posibles y imposibles, pero depués de tar faciendo un primer tiempu curiosu, el gol de Roa nel minutu 26 esbarrumbló toles esperances del Xixón, que contaba con ganar mientres echaba una güeyada al marcador del Nástic-Xerez. Valió con que Kaiku marease a Isma y marchare col balón pa que Roa metiere'l gol del trunfu. La defensa nin s'enteró, y amás Isma lesionose y va tar dellos meses ensin poder xugar. Esa xugada resumió l'añu del Sporting.Nel segundu tiempu, coles espulsiones de Juanra y Tabaré, el Levante guardose nel área y esperó los ataques del Sporting, que, de puro nerviosos, quedaron en ná. El Sporting ganose asina otru añu más (el quintu) en segunda.