Convocáu’l Premiu al Meyor Cantar 2008

"La Conseyería de Cultura y Turismu del Principáu d'Asturies convoca, un añu más, el Premiu al Meyor Cantar. Esti galardón tien como oxetivu premiar el que s'escueya como meyor cantar con lletra en llingua asturiana o gallego-asturianu comercializada a lo llargo l'últimu añu, siendo condición necesaria la creación orixinal de la mesma.

Pa ello'l Xuráu, compuestu por un máximu de nueve miembros ente los que s'atopen la Direutora Xeneral de Promoción Cultural y Política Llingüística y la Xefa de la Oficina de Política Llingüística nos puestos de Presidenta y Secretaria respeutivamente, tendrá de facer una preselección d'un númberu non superior a cinco obres.

La entrega de Premios tendrá llugar el día 21 de febreru nun actu públicu, y nella daráse a conocer públicamente'l nome de la obra ganadora. Ésta va recibir una escultura orixinal y una dotación económica de 1.000 euros, amás del compromisu del Principáu d'esparder y promover esti cantar nos medios de comunicación y nos eventos entamaos o promovíos pol propiu gobiernu.

L'añu pasáu compitieron pol premiu los grupos y solistes asturianos: Tejedor, Carlos Rubiera, La Tarrancha, Toli Morilla y Asgaya, algamando finalmente'l galardón el cantautor Toli Morilla cola obra ""Azul y Gris""."