La delegada nun entiende l'asturianu

La Delegación del Gobiernu n'Asturies, que preside la xixonesa Mercedes Fernández, refugó'l permisu a les más de trenta asociaciones cíviques y culturales que solicitaben facer dellos actos n'Uviéu con motivu de la celebración del 25 de mayu, xornada na que se conmemora'l llevantamientu de la Xunta Xeneral del Principáu contra la ocupación de la tropa de la Francia napoleónica. Ye una iniciativa bien interesante que supón la recuperación d'un día d'Asturies de raigón laicu énte la celebración impuesta l'ocho de setiembre coincidiendo col "día de la santina"El motivu pol que se niega'l permisu nun ye otru que l'escritu de solicitú diba n'asturianu, una escusa bien probe qu'amás yá nun tien xustificación por esistir antecedentes en contra. Nel añu 1999, el Tribunal Superior dio de pasu la candidatura electoral d'Andecha Astur que de mano echare p'atrás la Delegación del Gobiernu por tar n'asturianu. Ello ye'l motivu pol que les asociaciones convocantes de los actos del 25 de mayu tan plantegándose poné-y a la Delegada del Gobiernu un pleitu por prevaricación, que, como esclarien en comunicáu ye "dictar, sabiendo de la so incxusticia, una resolución arbitraria nun asuntu alministrativu". Pa los convocantes, ente los que tan la Xunta pola Defensa de la Llingua Asturiana, Xudefas, Belenos o l'Atenéu Obreru de Xixón ente otros, esta actuación supón tamién, en base a una interpretación llegalista y arbitraria del testu llegal, un ataque contra'l derechu constitucional a manifestase y aconceyase.