El gobiernu queda solu p'aprebar el Plan Forestal

La Xunta Xeneral del Principáu dio ayeri de pasu'l Plan Forestal d'Asturies, un documentu que va valir d'equí a dientro de sesenta años y nel que la superficie arbolada n'Asturies xube un 61%, colo que media Asturies sedría biesca.

Otra cosa ye como se reparte esa xuba. Dende qu'entamó a falase del plan va yá más d'un añu, Greenpeace yá criticare que'l documentu daba-yos puxu a los ocalitos, qu'ocuparíen 61000 hectaries en cuenta de les 52000 d'anguaño. Les pinares tamién tendríen más sitiu, con 45.000 hectaries más, cerca del doble de lo qu'hai agora. A la fin, les especies autóctones queden cola metada del aumentu, y lo otro va dir pa pinos y ocalitos, especies con aprovechamientu industrial en papeleres que doblen la so presencia. El plan tien un presupuestu global de más de 150 millones de €, de los que se dexen 30 en manes de la iniciativa particular.

Ello ye que na votación del plan el grupu parllamentariu socialista quedó solu, con PP, IX y URAS votando en contra d'esti plan. Nesti sentíu IX espublizó esti comunicáu el xueves avisando de que diba votar en contra del plan y esplicando los sos motivos pa nun sofitalu. Amás de solliñar el fechu de qu'el plan interpreta el monte namás en términos productivistes, la coalición d'izquierda centra la so critica del plan en que nun concuella coles directives agraries esistentes y en que nun trata dellos aspectos que sedríen clave como les perspectives de xeneración d'emplegu nel sector o, más grave, la tema de los incendios.