En Madrid dicen "Non"

Súpose esta selmana que'l Consejo de Universidades,
concretamente la Subcomisión d'Humanidaes, refugó los
planes d'estudiu de les titulaciones de Filoloxía Hispánica y
Románica col argumentu de qu'incluyen l'asturianu como segunda y tercer
llingua. La propia facultá y la Xunta de Gobiernu de la
Universidá ye teníen aprobaos estos planes, dientro del cambiu
obligáu de los mesmos, polo que la negativa del organismu del Gobiernu
Central, supón un despreciu tamién a lo aprobao na
Universidá asturiana. La noticia súpose coincidiendo cola
inauguración de los actos de la
Selmana de les Lletres
Asturianes n'homenaxe a Mª Josefa que tuvo llugar na Facultá de
Filoloxía.
Nesi actu, los profesores Xulio Viejo y
Ramón
d'Andrés declararon que la negativa a los planes convertíalos
en "profesores d'asignatures proscrites".
Pel so llau, Ana Cano, Decana de Filoloxía y presidenta de l'Academia mostróse disgustada y
ofendida pola decisión del "Consejo". Dixo que
la situación yera ridícula y que nun s'entiende como
l'Alministración educativa da de pasu la inclusión de
l'asignatura y l'adscripción de profesoráu de llingua asturiana
nes enseñances medies y primaria y depués ñégase a
aprobar los planes de la Universidá, encargada de formar a esi
profesoráu.
Polo visto ye la denominación del asturianu como
"llingua" lo qu'argumenten pa ello, colo que se vuelve a comprobar
que la llexislación actual nun garantiza los derechos básicos y
entra en conflictu permanente con ellos, cuando nun asuntu, cuando n'otru. La
negativa, según Ana Cano nun ye académica, sinón
política, llegando a dicir que nesti casu tamos pior qu'en tiempos de
Franco.
El Rector, preguntáu sobre l'asuntu dixo que yera un problema de
denominación y técnicu, ensin entrar a valorar otres cuestiones,
pero sí dixo que taba mui dolíu y qu'había que buscar
solución, anque nun yera fácil.
Pelo contrario, el Conseyeru de Cultura, Sr. Fernández Vallina
dixo que la llexislación
actual ye abondo pa da-y salida al problema, anque comentó que taba
triste y ablucáu pola noticia y que se ponía a disposición
de la Universidá pa "encalzar" lo que yera "un problema
importante".