Uviéu 3 - Elche 6

La derrota más escandalosa del añu llegó pal Uviéu nel peor momentu. Siguen en quinta plaza y a cinco puntos del ascensu, pero los carbayones van tardar en recuperase del guelpe moral que sufrieron ayeri. Les baxes de Boris, Óscar Álvarez y Nadj nun son escusa pa semeyante paliza.

Ello ye que la meta d'Esteban foi un coladeru. Hasta de cinco goles a cero llegó a ganar l'Elche, que nun podía creer lo que taba pasando. Cada vez que l'Uviéu sacaba'l balón yera pa perdelu en centru'l campu, onde siempre había daquién del Elche p'atacar. El primer gol visitante llegó nel minutu 2, y al descansu yá perdíen por cero a tres. Bien de xente marchó del Tartiere ensin quedar a ver la segunda parte, qu'arrancó col 0-4 pal Burgos obra de Serrano. Nino enanchó la cuenta de los burgaleses nel 66, momentu en que llegó la reacción azul, en parte gracies al meyor xuegu local, pero gracies sobremanera a la tranquilidá del rival, que yá tenía'l partíu más que ganáu. Amieva y Oli, que marcó dos veces, punxeron en marcador un 3-5 que nun valía nin pa disimular la vergüenza tan grande que se pasare. Moreno, yá casi
al acabar, metió'l 3-6 definitivu, col que la grada acabó d'esplotar. Los servicios de seguridá nun dieron abastu y col pitíu final, el públicu más enraxonáu invadió'l campu y fizo una sentada pidiendo la dimisión del Conseyu d'Alministración. Dellos que queríen recordar l'espectáculu marcharon hasta con tapinos del prau del Tartiere.