Eibar 2 - Sporting 0

El Sporting confirmó otra vuelta que ta gafáu n'Ipurúa, perdiendo por dos a cero un partíu ensin más historia que la d'echar el pesllu a una temporada, la cuarta en segunda, tan ramplona como les anteriores. Ensin xuegu y ensin gana, los de Xixón parez que tan condergaos a echar nel infiernu unos añucos más.

El Sporting salió al campu con pocu arte, y yá a los diez minutos Garitano metía'l primeru pal Eibar, que si ye l'equipu que más años lleva en segunda ye polo bien que trabaya nel so estadiu. Con un xuegu de muncha presión, los azulgranes nun dexaron a los asturianos sacar balón del so área, llegando a xugar los de casa cola defensa mui adelantada. Pela so parte, el Sporting namás tuvo en tola primer parte un par de detallucos de calidá con Pablo Álvarez y Villa, pero en nengún momentu como p'asustar a los vascos.

Na segunda, el Xixón quixo enmendase, cambiando a Pirri por Lozano, pero nel minutu 60 un balón muertu nel centru'l campu acababa nel 2-0 de Jorge Sánchez, que superaba la salida de Valencia. D'ehí al final yá nun hubo más que contar, porque el Sporting diose y los de casa tampoco nun ficieron muncho.