L'asturianu ruempe'l tripartitu en Siero

La selmana pasada, Izquierda Xunida de Siero anunció per boca del so portavoz Nicolás Fernández l'abandonu de la "Comisión Paritaria", esto ye, del acuerdu tripartitu que gobernó'l Conceyu de Siero ente PSOE, Conceyu (secesionistes de Llugones) y la propia Izquierda Xunida los últimos tres años dende les elecciones de 1998.
Anque les tensiones fueron munches a lo llargo de tou esti tiempu ente los socios de gobiernu, con polémiques urbanístiques, mediuambientales, llaborales, etc. el detonante diz que foi la falta de respetu que supunxo l'incumplimientu per parte del grupu municipal socialista a la hora de votar dos mociones nel plenu del pasáu xueves, depués de que se llegará a alcuerdos previos col PSOE de Siero sobre elles.
Concretamente les dos mociones facíen referencia al apoyu a los actos antiglobalización de la selmana pasada y a l'aprobación d'unes ordenances pa regular l'usu del asturianu nel conceyu, nes que IX quedó sola. Nesti sen, coincidiendo col resultáu negativu d'esta última, la Xunta pola Defensa de la Llingua Asturiana, promotora de la iniciativa, emitió un duru comunicáu criticando l'actuación del PSOE na votación y acusando a IX de "cómplice". Esti comunicáu sumóse a otru del partíu Izquierda Asturiana (IAS) tamién en términos mui duros, que xeneró una réplica y contrarréplica d'entrambes formaciones.
De momentu la coalición da llibertá de votu a los sos conceyales, pero ensin abandonar les responsabilidaes de gobiernu, polo menos hasta que se decida nun sen o n'otru nuna asamblea que van tener el día 4 de mayu, lo que yá provocó les primeres tensiones. Evidentemente, l'asturianu nun acabó col tripartitu, que ya taba abondo enviciáu, pero sí que foi la gota qu'enllenó'l vasu...