El Titanic Asturianu

Un día como esti, en 1911, el Titanic estrapallaba la proa contra un iceberg y fundía énte la costa de Terranova. La traxedia marítima más famosa de tola historia, na que desapaeció, ente otros, el millonariu Solomon R. Guggenheim, ye metáfora de la sociedá de clases y de la Europa que diba camín de la primer guerra Mundial, pero tien tamién curioses rellaciones con Asturies que puen atopase na rede.Aparte de que nel famosu tresatlánticu viaxare l'indianu avilesín Servando Ovies, resulta que de los mesmos astilleros Harland&Wolff de Belfast nos que s'armó'l Titanic tamién se construyó otru barcu col nome de "Asturias". Botáu en 1925 pa la Royal Mail Lines, l'Asturias tien una llarga historia tres de so, anque, neto que la tierra que-y dio'l nome, ensin final épicu que cantar. Tres décades faciendo rutes tresatlántiques, l'Asturias entovía aguantó los torpedos d'un submarín italianu na segunda Guerra Mundial, y siguió navegando hasta 1957, en que lu mandaron al desguace. Mientres los sopletes yá lu desarmaben per un estremu, el "Asturias" sirvió de plató pa rodar delles escenes de la película "A Night to Remember" que reconstrúi precisamente la traxedia del Titanic. Nesta semeya puede vese al Asturias carretando tropa pa la Guerra de Corea.