Más asturnautes

Los datos más nuevos del Estudiu Xeneral de Medios dan a Asturies el cuartu llugar del estáu por númberu d'usuarios con accesu a internet. Si yá según los datos anteriores Asturies despedió'l 2001 dando un reblagu de consideración que doblaba los accesos del 10,3% al 22,7%, la primer fola del 2002 confirma esta xuba y dexa 'l númberu d'asturianos y asturianes con accesu a la rede nel 23,3%, un puntu perriba de la media estatal del 22,2%.

Otru datu interesante ye qu'Euskadi ocupa agora el primer llugar n'accesu a internet, col 27,7% de la población conectao, quitándo-y el primer puestu a Cataluña, la comunidá qu'ocupó de siempre'l primer puestu na llista. De cualquier manera, aparte del despegue de la internet n'Asturies, que recortó la diferiencia que tenía con otres comunidaes, estos datos espeyen tamién l'estancamientu xeneralizáu de la rede. El mesmu estudiu del EXM reconoz que, de payares del 2001 p'acá namás apaecieron 350.000 usuarios nuevos de la rede en tol estáu, y, entovía más, en delles comunidaes como Navarra o Baleares hai menos internautes que va seyes meses.