Asturies preparada p'antroxar

"Como tolos años, les ciudaes y los pueblos d'Asturies celebren l'antroxu ente música, pasacais, folixa y mazcaritos. Dende asturies.com queremos animate a que sigas los programes de les ciudaes de Xixón, Avilés y Mieres al tiempu que conoces daqué más d'esta fiesta n'Asturies.

L'antroxu xixonés entamó yá cola fiesta Les Comadres, qu'anguaño celébrase con xintes onde nun falta la bona comida y bebida. Sicasí esta fiesta tuvo escaecida llargu tiempu, calteniéndose sobre manera en Xixón y La Pola Siero. En Xixón caltuvieren munchos años esta costume les famoses CIGARRERES DE CIMAVILLA, les trabayadores de la fábrica tabacu, a les que se xuntaben les sos afiaes, y otres muyeres coles que subíen a La Providencia, nes afueres de Xixón, a pasar la tarde de plática y merendar les casadielles y les ""teresites"" (llambionaes inventaes por una confitería de la ciudá ).
En La Pola Siero les muyeres subíen al llamáu Prau Malatu o Prau Picón a merendar bollos preñaos, sidra, y casadielles, ente otres coses. Sábese de la esistencia d'un Xueves de Compadres, dedicáu a los homes, qu'en dalgunos llugares pasó al domingu siguiente (""Domingu'l Gordu""), costume desapaecida anguaño.

N'Avilés son tradicionales los pasacais, asina como'l Descensu del Galiana, qu'esti añu llegó a la so edición númberu XXI. L'adautación de la fiesta l'antroxu a los nuevos tiempos amuésase na organización d'actividaes como'l II Tornéu Medieval d'Avilés, na llinia de los antroxos temáticos, y qu'esti añu algama mayor protagonismu na ciudá.

D'otru llau Mieres retrasa'l día grande hasta'l 8 de febreru, bien pasáu l'entierru la sardina, dispidida oficial de Don Carnal nos más de los pueblos y ciudaes d'Asturies.

D'esti mou n'Asturies tenemos manera d'allargar l'antroxu más d'una selmana, si bien el vezu va siendo esperar a mazcarase'l llunes d'antoxu, esti añu 4 de febreru.

Pa saber más sobre l'antroxu: ye tiempu d'antroxu"