L'asturianu Sergio Sánchez Goya al meyor guión orixinal

"La Direutora Xeneral de Turismu del Principáu, Elisa Llaneza Álvarez, aseguró qu'ésta foi la edición de los ""Goya d'Asturies"" pola reconocencia algamada poles películes rodaes n'Asturies y con apoyu del Gobiernu asturianu. Llaneza asistió ayeri a la ceremonia d'entrega de los Premios de l'Academia del Cine Español, p'apoyar a les cinco películes con sellu asturianu qu'algamaron 29 nominaciones, lo que ""constitúi un fechu ensin precedentes p'Asturies"".

Pa Elisa Llaneza, tanto les candidatures como'l resultáu final -- yá que 'El Orfanato' algamó siete Goyas -- amuesa qu'éstos foron ""los Goya d'Asturies ""porque nenguna otra comunidá ""tuvo l'acumulación de talentu cinematográficu como'l que se produxo n'Asturies el pasáu añu"". Nuna nota prensa, el Principáu recuerda que 'El Orfanato', que salía con 14 candidatures, algamó siete premios, ente otros a la Meyor dirección novel, pa Juan Antonio Bayona, y al meyor guión, pal asturianu Sergio Sánchez. La película rodada n'Asturies y apoyada económicamente pola Conseyería de Cultura y Turismu fízose, amás, col 'Goya' nes categoríes de dirección artística, maquillaxe, efectos especiales, soníu y dirección de producción. Elisa Llaneza asegura que los Premios Goya constituyen ""una espléndida promoción"" d'Asturies. Al so xuiciu, el cine ye un escaparate esceicional ""pa xenerar curiosidá sobre'l nuesu destín turísticu"". Por esti motivu, la Conseyería de Cultura y Turismu ""va siguir sofitando a los direutores y productores de cine, yá seyan mozos o profesionales consagraos, pa que sigan apostando por Asturies como'l meyor plató natural, una maraviya pa filmar, pol so paisaxe, la so lluz y la so tranquilidá"".

El Principáu cuenta crear una estructura que facilite los rodaxes n'Asturies pa los profesionales del cine. El Gobiernu del Principáu patrocinó películes como 'Cenizas del Cielo' (José Antonio Quirós), 'La torre de Suso' (Tomás Fernández), 'Oviedo Express' (Gonzalo Suárez) y 'Tres mujeres' (Javier Elorrieta). Y concedió ayudes pa 'Luz de Domingo' (José Luis Garcia), 'El Orfanato' (Juan Antonio Bayona), 'Pudor' (David Ulloa y Tristán Ulloa), 'Proyecto Killer' (Corto Nacho Carballo).

Les aportaciones económiques de los presupuestos autonómicos a estos trabayos sumen 1,2 millones d'euros. Demientres que la llinia de sovenciones pa cinta y videu de la Direición xeneral de Promoción Cultural fizo posible financiar, nos caberos dos años, un total de 23 proyeutos."