Extremadura 1 - Sporting 2

Per una vegada, el Sporting tuvo suerte. Ensin facer un partíu curiosu, los d'Acebal marcaron dos goles en primer tiempu que-yos valieron el trunfu nun campu como'l d'Almendralejo que nun semryaba de los más fáciles pa sacar puntos. Soto y Villa, el másimu realizador del Sporting esti añu, firmaron un trunfu que pon al Sporting en sesta posición y que fai imprescindible ganar al Rácing de Santander la selmana qu'entra si se quier aspirar al ascensu.El Sporting salió al campu convencíu de que tenía que ganar, mientres l'Estremadura, que ta cayendo en barrena na clasificación, nun fizo un res por pará-yos los pies a los d'Acebal, que, baxo un calor de veranu, xugaron un primer tiempu bastante pasable, mientres nel equipu estremeñu los únicos que xugaben algo son Kiko y Pier, a los que'l restu l'equipu mandaba balones bombiaos dende atrás ensin gastar munchu arte. Énte esti panorama, Alberto y Soto fabricaron el gol del Xixón, pero l'Estremadura empató namás sacar de centru aprovechando un furacu de la defensa asturiana. La cosa quedaba otra vez como al entamu, pero entós resucitó la conexón ente Lozano y Villa, que marcó'l gol del trunfu. Yera la primer vez na temporada que'l Sporting marcaba nes dos llegades curioses a portería que tenía. Hubo una tercera de Villa, que junó al porteru estremeñu adelantáu, pero Felip reculó lo xusto pa mandar a corner lo que pudo ser el 1-3. Pela so parte, l'Extremadura namás tuvo una ocasión en bota de Pier, que tiró fuera.Na segunda parte el Extremadura apretó más, creando ocasiones que nun foron gol porque'l poste conxuró bien d'elles. Dos postes y un balón fuera foron el balance d'ataque de los locales, mientres el Sporting, que se suponía qu'a la contra xugaría más tranquilu, nun yera quien a llegar arriba, cuayando una segunda parte bastante tristayona. A la fin, tres puntos que salieron baratos pero que valen muncho.