L'enseñu a debate

La reforma educativa plantegada pol Gobiernu del estáu al rodiu de la Llei de Calidá xeneró un de los debates más importantes de la selmana. Dellos puntos de la reforma, como el que se desepare a los alumnos que saquen menos nota o el que se-yos obligue a los escolinos escoyer más temprano ente metese a la universidá o empobinase a estudiar un oficiu xeneren bastante rocea ente la oposición y bien de la comunidá educativa.El debate nel estáu llega cuando n'Asturies ta tamién ta discutiéndose'l currículum asturianu pa secundaria, documentu que tien que marcar la llínia de los conteníos del enseñu d'agora en p'alantre. Delles fuerces polítiques y sindicales tan posicionándose sobre la tema. El Grupu Parlamentariu d'Izquierda Xunida, qu'ayeri dio una rueda de prensa, foi mui duru cola reforma del PP, que-y abulta retrógrada porque dicen qu'elimina del sistema a quien nun ye quien a enxertase nel. IX denuncia tamién que ta escaeciéndose'l debate de fondu, que pasa por saber qué ye lo que-y tien qu'aportar el sistema educativu a los alummnos. Nel so comunicáu IX diz que la rempuesta dende'l Gobiernu asturianu a la Llei de Calidá ye medranosa y que namás critica que aspectos formales de la mesma.Sobre la redacción del currículum asturianu de secundaria pronunciáronse'l sindicatu d'enseñanza Suatea y les Mocedaes d'Izquierda Asturiana. El Suatea, que presentó estes alegaciones al testu de la Conseyería, critica sobremanera'l tratmientu que se-y da a la llingua asturiana nel testu, nel qu'aprecien bones intenciones pero falta de disposiciones pa faceles rialidá. Pela so pate, les Mocedaes d'Izquierda Asturiana, que carguen tanto pa la llei de calidá como pal proyectu curricular, céntrense na percepción que se fai d'Asturies nel testu de la conseyería, del que dicen que da un conceptu provincianu d'Asturies nel que tolo que s'enseña sobre'l país ye na midía en que se vincula cola historia y la realidá d'España, escaeciendo lo que define Asturies "per se". Na tema de la llingua, el testu de MIAS ye abondo más críticu que'l de SUATEA, concluyendo que l'asturianu sigue en piores condiciones d'escolarización que les llingues extranxeres