El Farho Xixón Baloncestu elimináu pol Vic nes semifinales

"El Farho Xixón Baloncestu foi elimináu na semifinal de la Copa Adecco LEB Plata que se xugó esti fin de selmana en Palencia pol Vic pol resultáu de 78 a 69. Los xixoneses tuvieron un entamu partíu permalu -nel que namás metieron cuatro puntos, toos ellos de Chus Pineda- y pesó-yos como una llabana nel restu l'alcuentru. Los asturianos tuvieron delantre nel marcador col 0 a 2, el restu l'alcuentru foron tres de los catalanes. El Vic llegó a tener una ventaya de venti puntos, 46 a 26, nel tercer cuartu. Los xixoneses reaccionaron y punxéronse a seis puntos, 63 a 57, pero nun-yos valió pa remontar el marcador y ganar l'alcuentru. Los asturianos volvieron a fallar nel tiru, con unos porcentaxes ridículos nos triples, 17% -metieron 4 de 24 intentos- y tamién tuvieron mal nel tiru de dos -46%, 18 canastes de 39 intentos- y nos tiros llibres -66%, con 21 encestaos de 32 intentos-.

Amás foron inferiores nel rebote -los catalanes garraron 35 por 28 de los xixoneses- y nes asistencies -15 por 9-. Otru aspeutu negativu a destacar foron los muncho balones perdíos -catorce-, anque'l Vic perdió más -ventidos-. Nel partíu nun xugó Matt Kiefer, anque yá ta recuperáu de la mancadura, y xugó diecisiete minutos Brandon Wolfram. Logi Gunnarsson -que xuega d'escolta- xugó de base y con ello l'entrenador, Jorge Elorduy, postergó a Sergio Alonso -namás xugó cuatro minutos y mediu-, que paez que va ser cortáu esta selmana pol baxu rendimientu que vien ufiertando a lo llargo la temporada. Otru xugador que tamién paez que nun se cuenta con él ye Lucian Kieser, que nu xugó nin un segundu. Los xugadores del equipu asturianu más destacaos forn Adrián García (15 puntos, 3 rebotes y ficiéron-y 7 faltes personales), Sony Vázquez (17 puntos, 3 rebotes y 1 asistencia) y Brandon Wolfram (9 puntos, 6 rebotes y 1 asistencia). La Copa Adecco LEB Plata ganola'l Vic que na final venció al Illescas por dos puntos, 64 a 66.

Ficha técnica: Akasvayu C. B. Vic:Florin Dragussn (4),Eduard Jiménez (8), Albert Sabat (15),Jesús Aranda (5) y Eulis Báez (5). Tamién xugaron: Sergio Soria, Martí Naulart (4), Albert Teruel (3) y José Amador (19).
Farho Xixón Baloncestu: Rubén Suárez, Peter Rajniak (5), Adrián García (15), Chus Pineda (12) y José María Balmón (3). Tamién xugaron: Sergio Alonso, Sony Vázquez (17), Logi Gunnarsson (8) y Brandon Wolfram (9).
Árbitrios: Juan Francisco González y Ángel Antonio Albacete. Nel Farho Xixón Baloncestu foi elimináu por cinco faltes personales Rubén Suárez, nel Vic nun hebo eliminaos. Partíu de semifinales de la Copa Adecco LEB Plata xugáu nel Pabellón Marta Domínguez de Palencia. Parciales per cuartos: 19-4, 11-16, 23-15 y 25-34."