La llingua asturiana va tar presente en "Expolangues"

"El Gobiernu del Principáu d'Asturies va promocionar la llingua asturiana nel alcuentru 'Expolangues', que va tener llugar los díes 6, 7, 8 y 9 de febreru en París. Trátase d'un salón internacional de llingües falaes en tol mundiu, tanto con calter mayoritariu como minoritariu, cuntando Asturies col so propiu stand. Asina lo anunció la Direutora Xeneral de Promoción Cultural y Política Llingüística, Consuelo Vega, nuna rueda prensa na que tuvo acompañada por Marga Magadán, vocera del Gremiu d'Editores Asturianos, entidá qu'aconceya a les 24 empreses editores d'Asturies, y que tamién va tener la so representación, xunta con otres instituciones como L'Academia de la Llingua, nel 'stand' asturianu de París.

En Principáu cuenta distribuir bayurosa información documental, ente la que rescampla un folletu informativu escritu n'asturianu y tornáu al inglés, francés y alemán, y per otru al catalán, euskera y gallegu, nel que s'esplica'l conceutu, l'orixe, la historia y la situación actual de la 'llingua' asturiana y de la so producción lliteraria, cifrando'l númberu actual de falantes en más de 250.000.

El stand va inaugurase'l día 6 a les 18 hores nel Parc Expo de París. Nel actu, amás de Vega y Magadán, van tar presentes ente otros, la presidenta de l'Academia de la Llingua, Ana Cano, y el poeta Pablo Antón Marín Estrada, ganador del premiu de poesía Xuan María acebal 2007. Vega sorrayó la importante oportunidá de ""promoción internacional de la 'llingua'"" que supón esti foru."