El gobiernu turcu nun quier llibros de Chomsky

Los llibros de Noam Chomsky nun-y faen nin gota gracia al gobiernu turcu. El profesor de llingüística del Massachussets Institute of Technology, conocíu polos sos escritos sobre política internacional y sobre la manipulación nos medios de comunicación, tuvo que dir en persona al xuiciu contra'l so editor n'aquel país pa evitar que lu metieren presu. Al editor Fatih Tas pedíen-y un añu de cárcele por espublizar un llibru de Chomsky en que s'acusaba al estáu turcu de reprimir a la población kurda. El mesmu Tas reconoció que de nun ser pola presión internacional y la presencia del mesmu Chomsky en xuiciu, metíenlu presu de xuro.