Galicia ¿espeyu d'Asturies?

Esti día, empresarios madereros asturianos ficieron una visita a Galicia pa conocer de cerca'l plan forestal de los nuestros vecinos. Galicia ye la comunidá del estáu que más madera vende, y tien cada añu más superficie forestal. Otro bien distinto ye qué se pon nesa superficie. Neto que nel casu del plan forestal d'Asturies, que yá llevó bien de crítiques, el plan gallegu, que'l PP enseña como ún de los sos trunfos, tamién mereció la crítica d'organizaciones ecoloxistes como Greenpeace. Dende la visión de Greenpeace, dambos planes tan pensaos pa un aprovechamientu madereru que mira más por sacar perres a curtiu plazu que por otros rendimientos menos tanxibles pero de gran valir mediuambiental. En Galicia, la entrada masiva d'ocalitos y pinares en forma de monocultivu, incluso perriba de lo que traía escrito'l plan, ye namás la consecuencia más evidente del plan forestal gallegu, que lleva diez años funcionando, mientres el d'equí ta acabante d'echar a andar. Salvando les diferencies, la situación gallega apurre la visión más negativa de lo que podría pasar n'Asturies.Otramiente, nun son namás los grupos ecoloxistes los que critiquen la política forestal gallega. El PSOE, nel so boletín de mediu ambiente, tamién echó pa contra'l plan gallegu, cuando Asturies ta acabante d'echar a andar un plan distintu y menos duru que'l gallegu, pero que nun dexa de concuellar con elli en dellos oxetivos.