La Universidá, primer pasu

La Xunta Moza, estaya xuvenil de la Xunta pola Defensa de la Llingua convocó un "encierru" dende ayeri a la 1 de la tarde nes dependencies de la Xunta de Gobiernu de la Universidá d'Uviéu, en protesta pola negativa del Conseyu d'Universidaes a aprobar la creación de la especialidá de llingua asturiana, demandada pola propia Universidá y pol Parlamentu asturianu yá por tres veces.
Los alumnos pesllaos recibieron apoyu de delles asociaciones y colectivos sociales, asina como de bona parte del profesoráu, que ven con preocupación lo que en palabres de Xunta Moza ye una "burlla a la Universidá, despreciu a les instituciones y a l'autonomía asturiana y imposición a los ciudadanos".

Tres 24 hores trancaos nel edificiu históricu, l'encierru terminó güei a la 1 del mediudía. Esti actu encuádrase nuna campaña de protesta poles agresiones repetíes a la llingua asturiana de los últimos meses, con decisiones como la del Conseyu d'Universidaes, el "avisu" del MEC de que l'enseñu del asturianu nun podrá consideráse asignatura "normal" en secundaria pola falta d'oficialidá, les impugnaciones de la Delegación del Gobiernu a les ordenances de Nava y a la oficialidá en conceyu de Castrillón o la burlla constante de la Conseyería d'insfraestructures a la toponimia asturiana, que van rematase con una gran manifestación pal día 2 de febreru n'Uviéu, convocada pola Xunta y sofitada por sindicatos, partíos y organizaciones sociales.