Güei ye’l conciertu d’apoyu a Radio Sele

Nel Auditoriu "Príncipe Felipe" d'Uviéu, celébrase esta tarde a les 7 hores un actu d'apoyu a Radio Sele, una emisora que lleva emitiendo dafechu n'asturianu dende fai 15 años y a la que'l Gobiernu asturianu-y retiró la concesión d'una llicencia comercial previamente axudicada, nun actu ensin xustificación nin precedentes y sospechosu d'amiguismu políticu en favor de grupos afines.
La Plataforma d'Apoyu, integrada por partíos políticos, asociaciones culturales, sindicatos, asociaciones xuveniles y ciudadanes entama esti actu nel que van tener llugar actuaciones musicales y "performances" artístiques non sólo representatives sinón de lo meyor del mundu cultural asturianu. La entrada val 8 euros y pue mercase nel propiu Auditoriu o nes taquilles del Teatru Campoamor. Pues ampliar información na nuesa sección de música o na web especial de la Xunta pola Defensa de la Llingua.